Roðagyllum heiminn
Á hverju ári standa Soroptimistar fyrir átaki gegn kynbundnu ofbeldi. Hér á landi höfum við kosið að kalla það "Roðagyllum heiminn" (e. Orange the World).
Mismunandi áherslur eru milli ára - síðast var slagorðið "Þekktu rauðu ljósin" með áherslu á fræðslu og útskýringar, auk frásagna frá þolendum.
Kvennaathvarfið
Soroptimistasamband Íslands hefur lagt Kvennaathvarfinu lið á ýmsan hátt. Bein fjárframlög úr verkefnasjóði, framlög frá einstökum klúbbum og fjáraflanir sem fram hafa farið á sameiginlegum fundum systra.
Á myndinni má sjá systur úr Austurlandi ásamt starfsmanni Kvennaathvarfsins, þegar systur að austan afhentu afrakstur happdrættis sem fór fram á Haustfundi 2018. Þar söfnuðust 450 þús. og fór upphæðin óskipt í þetta góða málefni.
Umhverfisverkefni
Verndun umhverfis og náttúru er viðfangsefni margra klúbba og styður sambandið þau heils hugar. Sem dæmi fara Snæfellsnessystur reglulega á Búðir í hreinsunarferðir og Heiðmerkurreiturinn er sameiginlegt verkefni systra á SV-horninu.
Valdefling kvenna
Verkefni sem lúta að menntun og valdeflingu kvenna eru áberandi í starfi sambandsins. Má þar nefna verkefni Kópavogsklúbbs, sem lýtur að því að hjálpa ungum mæðrum að mennta sig og skapa sér og börnum sínum betra líf. Sjálfstyrking ungra stúlkna er á verkefnalista margra klúbba og einnig aðstoð við konur af erlendum uppruna og fleira í þeim dúr.
Heilsa og velferð
Víða eru í gangi verkefni til stuðnings konum og börnum. Fjármögnun á aðstöðu fyrir fatlaða, bókagjafir til verðandi foreldra, aðstoð við fatlaða einstaklinga og tækjagjafir til kvenna- og fæðingardeilda eru dæmi um slíkt.